نام نہاد پیروں سے دشمنی بلکہ جیلسی (لفظ جلاپا سے زیادہ کھندک ٹپکتی ہے) تو کافی پرانی ہے لیکن اب لگتا ہے نجومیوں سے بھی دو دو ہاتھ کرنے پڑیں گے۔ مسئلہ میرا یہ ہے کہ دہائیوں کی تعلیم کے بعد بھی مجھے اس بات پر اعتراض ہے کہ میں عالم کیوں نا بن سکا۔ بن نا سکا یہ میری نالائقی لیکن یہ نا اہلی مجھ سے ہضم نہیں ہوتی کہ اپنے آپ کو عالم کہلوا بھی نا سکا۔ اتنا تو بزدل نا تھا کہ اندھوں میں کانا راجہ بننے کی ناکام کوشش بھی نا کرتا۔ ویسے بھی جاہلین کا جو اعلٰی و ارفع درجہ اور تعداد ہمارے ہاں موجود ہے اس کے ہوتے ہوئے مجھے اپنی اس شکست کو تسلیم کرنا چاہئے اور جلد از جلد کسی دو آتشی پیر کے آستانہء عالیہ بلالیہ جلالیہ اور بعد میں ملالیہ پر حاضری دے کر اپنی ناکامیوں کو بخشوانا چاہئے کہ کیا پتا میں دنیا کہ ساتھ ساتھ اپنی آخرت میں بھی تاریکیاں بھرتا رہا ہوں؟ اور کسی نجومی کے در اقدس پر حاضری دے کر اپنے دنیاوی مستقبل کا بندوبست بھی کرنا چاہئے کہ ناکامی کے ساتھ ساری زندگی تھوڑا ہی گزاری جا سکتی ہے؟ آکر خدائی کے دعویدار جو ہوئے
اصل تصویر دیکھنے کے لئے کلک کریں
بچھڑے ہوؤں کو ملانا: میرے موبائل کو چھنے ہوئے آج پورا سال ہونے کو آیا ہے (ایس ایم ایس کے شوقین حضرات نجومی صاحب کو اس جملے ”بچھڑے ہوؤں کو ملانا“ پر پلیز بخش دیں)۔
شادی میں رکاوٹ : شادی میں ایک بڑی رکاوٹ ہوتی ہے فنڈز کی کمی، امید ہے قرضہ بھی دیتے ہوں گے، ہیں
کہیں یہ ڈبل شاہ کا فرینچائز تو نہیں؟ اور لڑکی کہاں سے آئے گی؟شوہر کو راہ راست پر لانا: نہیں، میں قسم کھانے کو تیار ہوں کہ میری بالائی اور مغربی علاقوں کے رہنے والوں سے قطعاً کوئی رشتہ داری نہیں۔
انعامی چانس: 50 روپے والا پرائز بانڈ لیا تھا کسی زمانے میں، آج بھی میز کے شیشے کے نیچے یادگار کے طور پر رکھا ہوا ہے۔ شکر ہے اس کا نقصان بھی پورا ہوسکے گا اب، اور نجومی صاحب کی فیس کا انتظام بھی۔
اولاد کا نا ہونا یا ہو کر مر جانا: یعنی کہ اب مجھے نجومی صاحب کے لئے کردار کی خرابی کا رسک بھی لینا پڑے گا
۔گھریلو ناچاقی: یقیناً گھریلو ناچاقی پیدا کرنے میں بھی ید طولٰی رکھتے ہوں گے، نجومی صاحب کی قابلیت پر کس کو شک ہے ۔
دشمن۔۔۔: یعنی سوات کے حالات کے لئے بھی نجومی صاحب مدد فراہم کر سکتے ہیں۔
کالے علم کو واپس دشمن پر بھیجنا: طالبان کو واپس بھیج کر دکھائیں تو مانیں نا!
عورتوں کے لئے پردے کا نہایت اچھا انتطام موجود ہے: یعنی مجھے ببانگ دہل اپنی عرضداشت پیش کرنی پڑے گی؟ اور یہ نہایت اچھا انتظام کونسا ہوتا ہے؟
موبائل 15 : ہیں یہ نمبر؟ مطلب صرف فون کرو تو گھر سے اٹھا کر لے جانے کا انتظام موجود ہے؟
یار لوگوں کے اصرار پر اس پوسٹ کا نام ”پھر کیڑے“ رکھ کر اعتراض کی گنجائش کو ختم کرنے کی ناکام کوشش کی گئی ہے۔
ابتک تبصرہ جات 30
لنک پوسٹ کرنے کی اجازت نہیں، سپیس ڈال کر لنک بریک کردیں، ربط والے تبصرے ختم کر دئے جاتے ہیں